RTÉ Ag Tacú leis na hEalaíona – Athbhreithniú 2025 | Imeachtaí Eanáir 2026

In 2025, bhí RTÉ bródúil as tacaíocht a thabhairt do 185 imeacht a bhain leis na healaíona agus leis an gcultúr fud fad oileán na hÉireann, agus is fás suntasach é seo ó seoladh an scéim an athuair in 2014, tráth ar tugadh tacaíocht do 98 imeacht. Is ionann sin agus méadú suntasach de bheagnach 89% thar 11 bhliain, rud a thugann léargas ar thiomantas leanúnach RTÉ do phobal cruthaitheach na hÉireann.

Lean an tionscnamh iomráiteach, a fuair an Gradam Aitheantais Speisialta Business to Arts in 2018, ar aghaidh ag dul i dtreise. 170 imeacht a bhí i gceist in 2023 ach d’ardaigh sé seo go dtí 185 imeacht in 2025. Léiríonn an fás seasta seo go bhfuil ról ríthábhachtach ag an scéim maidir le rannpháirtíocht i gcúrsaí cultúir a chothú agus a chur chun cinn ar fud na tíre.

Cuidíonn an scéim RTÉ Ag Tacú leis na hEalaíona leis an bhfreastal a dhéantar ar imeachtaí ealaíon ar fud na hÉireann. Ar na himeachtaí seo tá raon éagsúil seánraí: ón gceol, amharclannaíocht, damhsa, ceoldrámaíocht, agus filíocht go dtí na hamharcealaíona, taispeántais ealaíne, imeachtaí do pháistí, féilte liteartha, scannáin, agus cláir Ghaeilge. In 2023, tháinig méadú 30% bliain ar bhliain ar na feachtais a chuir RTÉ ar fáil chun tírdhreach cultúir saibhir na hÉireann a chur chun cinn, rud a threisigh a stádas mar phríomhthacadóir do na healaíona.

Mar gheall go ndéantar bolscaireacht thiomnaithe ar ardáin teilifíse, raidió agus dhigiteacha ar fad RTÉ, mar aon le han-tacaíocht a bheith tugtha di ar na meáin shóisialta agus ar na seirbhísí léiriúcháin, is líne tarrthála d’earnálacha cruthaitheacha agus cultúir na hÉireann í an scéim i rith an ama. Mar thoradh ar an bhfeiceálacht agus an sroicheadh a chuireann sé ar fáil, cabhraíonn RTÉ le healaíontóirí agus le heagraíochtaí ceangal le lucht spéise fud fad na tíre.

Dúirt Kevin Bakhurst, Príomh-Stiúrthóir, RTÉ: “Deirim go minic go bhfuil RTÉ ag Tacú leis na hEalaíona ar cheann de na tionscnaimh is luachmhaire a dtugaimid faoi in RTÉ. Tar éis dom freastal ar imeachtaí ealaíon éagsúla i mbliana, cuireann sé iontas orm i gcónaí go bhfuil saol na n-ealaíon agus an

chultúir chomh saibhir agus chomh bríomhar sna pobail ar fud na hÉireann. Tá sé ríthábhachtach go mbeadh gach is féidir á dhéanamh againn chun tacú leis seo. Tá luach ag baint i gcónaí leis an infheistíocht a dhéantar in am craolta bolscaireachta a thugann deis don oiread sin léirithe agus imeachtaí tábhachtacha an lucht spéise ar fud na tíre a bhaint amach agus cabhraíonn sí le lucht spéise a mhealladh isteach trí dhoirse hallaí paróiste, ionaid pobail, amharclanna agus ionaid agus suíomhanna eile ina mbíonn na himeachtaí ealaíon agus cultúir seo ar siúl. Táimid bródúil as bheith ag tacú leis an obair iontach seo.”

Beidh RTÉ ag tacú le 12 imeacht ealaíon agus cultúir tríd an scéim i mí Eanáir. Áirítear i measc na mbuaicphointí an Fhéile: First Fortnight Mental Health Arts and Culture (6–17 Eanáir), tionscnamh ceannródaíoch a úsáideann ceol, amharclannaíocht, scannánaíocht, agus an focal labhartha chun aghaidh a thabhairt ar an stiogma a bhaineann leis an meabhairshláinte agus an fholláine a chur chun cinn ar fud na hÉireann. Chomh maith leis sin beidh TradFest 2026 againn. Seo í an fhéile ceoil thraidisiúnta agus ceoil tíre is mó in Éirinn a thugann scoth na dtaibhithe chuig ionaid íocónacha Bhaile Átha Cliath, chun ceiliúradh a dhéanamh ar an saibhreas a bhaineann le hoidhreacht cheoil na hÉireann chomh maith le healaíontacht an cheol chomhaimseartha.

Taobh amuigh de na féilte suaitheanta seo, tá RTÉ bródúil as bheith ag tacú le raon éagsúil d’imeachtaí a thugann ardán don fhairsinge a bhaineann le tírdhreach cultúir na hÉireann. Ó Bhaile Átha Cliath go Gaillimh, ó Bhéal Feirste go Cionn tSáile, is féidir leis an lucht spéise blaiseadh a fháil de mheascán neamhghnách den chruthaitheacht. I measc na mbuaicphointí tá an mórthaispeántas Picasso: From the Studio at the National Gallery, tiocfaidh ceol aireagail den chéad scoth chugainn leis an Wigmore Series Dublin, chomh maith le himeachtaí ceiliúrtha bríomhara ar nós The Kinsale Beatles Festival.

Beidh deis ag an dream a dtaitníonn an amharclannaíocht leo taitneamh a bhaint as The Dead san MoLI – Músaem Litríochta Éireann, agus as an dráma géar, tráthúil Eureka Day in amharclann an Gate, chomh maith le féilte ar nós Nollaig na mBan agus Brigit: Dublin City Celebrating Women ina dtabharfar

ómós do thraidisiúin chultúir agus do chruthaitheacht na mban. Beidh Féile nuálach MfG Midwinter Festival – The Quartet Extends ar siúl i nGaillimh, chomh maith le Tonnta, féile de chuid Ghaillimh le Gaeilge ina ndéantar ceiliúradh ar Ghaillimh mar chathair dhátheangach na hÉireann trí chuireadh a thabhairt do chách plé leis an nGaeilge ar bhealach bríomhar agus cuimsitheach. Cruthaítear eispéireas fáilteach dátheangach do chách le linn na féile – is cuma má tá tú líofa sa teanga nó díreach ag tosú amach – agus aird á tarraingt ar fhíorspiorad dátheangach na Gaillimhe. Cuireann Béal Feirste meascán cultúir ar leith os ár gcomhair le FOLK iN FUSION – Belfast Meets Nashville agus traidisiúin shaibhir cheol tíre na hÉireann agus fuaimeanna anamúla Americana á dtabhairt le chéile i malartú cultúir uathúil. Déanann an ócáid bhríomhar seo, ina mbíonn ealaíontóirí aitheanta as Béal Feirste agus as Nashville ag comhoibriú le chéile, ceiliúradh ar an oidhreacht chomónta scéalaíochta a bhaineann leis an dá sheánra.

Léiríonn an meascán iontach seo den amharc-ealaín, ceol, amharclannaíocht agus ceiliúradh an chultúir a dhíograisí agus atá RTÉ mar a bhaineann le saol bríomhar ealaíon na hÉireann a chur chun cinn i ngach cearn den tír. Chun teacht ar na sonraí faoi na himeachtaí ar fad téigh chuig http://rte.ie/culture