Ceoltóirí agus amhránaithe 2FM Rising na bliana 2026 fógartha ag 2FM
D’fhógair RTÉ 2FM inniu liosta cheoltóirí agus amhránaithe 2FM Rising na bliana 2026, a rabhthas ag tnúth go mór leis, agus tús á chur leis an ochtú bliain de sheachtain 2FM Rising ar The Tracy Clifford Show idir 12 meán lae agus 3pm. Gach bliain, roghnaíonn painéal saineolaithe cuid den dream is nuaí in Éirinn a bhfuil gealladh fúthu le tacaíocht a thabhairt dóibh faoin tionscnamh seo, agus is iad ceoltóirí agus amhránaithe 2026 ná… Aaron Rowe, Curtisy, Florence Road, Jessica Doolan, mischa and the bear, MOIO, New Spectrum, Post-Party, Roe Byrne agus RuntheRed. Tarraingeoidh The Tracy Clifford Show aird gach lá i rith na seachtaine seo ar dhá cheann de na taibheoirí atá roghnaithe agus cuirfear iad féin agus an ceol spreagúil atá acu i láthair na n-éisteoirí. Tacófar leis na deich gcinn atá roghnaithe don bhliain 2026 agus cuirfear chun cinn iad ar 2FM i rith na bliana ar fad.
Is éard a dúirt Adam Fogarty, Stiúrthóir Ceoil RTÉ 2FM: “Ní hamháin go bhfuil sé mar chuid dár sainchúram in 2FM ceol na hÉireann a chur chun cinn, ach tá an claonadh sin ó nádúr ionainn agus tá 2FM Rising 2026 ag leanúint le traidisiún a bhfuilimid thar a bheith bródúil as. Léiríonn ceoltóirí agus amhránaithe liosta 2FM Rising na bliana seo an chúis a bhfuil an tionscnamh seo tábhachtach go soiléir, is iad an chéad rabharta eile de cheoltóirí agus d’amhránaithe cumasacha atá ag imirt tionchair ar thodhchaí spreagúil agus éagsúil an cheoil in Éirinn. Tá muid thar a bheith bródúil as an oidhreacht atá tógtha ag 2FM Rising ó
2018 i leith agus as na ceoltóirí agus na hamhránaithe Éireannacha a bhfuil tacaíocht tugtha againn dóibh. Cruthaíonn sé bliain i ndiaidh bliana go bhfuil sé de chumhacht ag an tionscnamh tús maith a thabhairt do roinnt de na guthanna nua is tábhachtaí in Éirinn agus is mór an onóir dúinn cabhrú leo an chéad chéim eile a ghlacadh.
Ar na ceoltóirí agus na hamhránaithe a bhí ar 2FM Rising roimhe seo bhí Amble, Denise Chaila, Fontaines D.C, Gemma Dunleavy agus Dermot Kennedy. Chun tuilleadh eolais a fháil faoi cheoltóirí agus amhránaithe uile na bliana seo, féach ar: www.rte.ie/2fmrising
Seo a bhí le rá ag Stiúrthóir Margaíochta agus Forbartha Ballraíochta IMRO, Keith Johnson, “Is ábhar mórtais é do IMRO tacaíocht leanúnach a thabhairt do RTÉ 2FM Rising, tionscnamh a bhfuil ról ríthábhachtach aige mar a bhaineann le haird a tharraingt ar an gcéad ghlúin eile de cheoltóirí agus d’amhránaithe na hÉireann. Cuireann RTÉ 2FM Rising ardán ar fáil gach bliain do cheoltóirí agus d’amhránaithe atá ag teacht chun cinn ionas gur féidir leo dlús a chur lena ngairmeacha beatha, agus tá an rud céanna i gceist i gcás lucht na bliana 2026. Tugann na ceoltóirí agus na hamhránaithe seo léargas ar an gcruthaitheacht, an éagsúlacht agus an uaillmhian a bhaineann le pobal ceoil na hÉireann sa lá atá inniu ann. Tá lúcháir orainn cabhrú lena bhforbairt agus tá muid ag tnúth leis an dáimh a bheidh ag an lucht éisteachta agus féachana sa bhaile agus níos faide i gcéin lena gcuid saothar.”
Éist le The Tracy Clifford Show ar 2FM ó 12 meán lae go dtí 3pm agus cloisfidh tú míreanna 2FM Rising.
CRÍOCH
Dáta: 5 Eanáir 2026
Le haghaidh tuilleadh eolais déan teagmháil le: Jade Carpenter, RTÉ Ceannaire Cumarsáide, Jade.carpenter@rte.ie.