Tús á chur ag RTÉ agus Virgin Media Television le craoladh cuimsitheach saor ó tháille ar an aer ar Chomórtas na Sé Náisiún 2026

Ní chaillfidh lucht leanúna an rugbaí oiread agus nóiméad den aicsean i rith an earraigh agus comórtas na bhFear, comórtas na mBan agus an comórtas Faoi-20 á gcraoladh beo agus saor in aisce-ar-an aer ag RTÉ agus Virgin Media Television

D’fhógair RTÉ agus Virgin Media Television mionsonraí inniu faoin gcomhaontú craoltóireachta eatarthu maidir le Comórtas na Sé Náisiún 2026, arna chinntiú gur féidir leis an lucht féachana taitneamh a bhaint as gach cluiche le hanailís ó shaineolaithe, léargas breise ó thaobh-na páirce agus tráchtaireacht den-scoth ó thús go deireadh an chomórtais. Beidh gach cluiche i gComórtas na bhFear, i gComórtas na mBan agus sa Chomórtas Faoi 20 á gcur ar taispeáint beo agus saor ó tháille ar an aer.

Cuirfear tús leis an aicsean Déardaoin, an 5 Feabhra 2026 ag a 7 i.n., nuair a bheidh an chéad chluiche de Chraobhchomórtas na bhFear á chraoladh ar Virgin Media One, Virgin Media PLAY agus RTÉ Radio 1, Éire in aghaidh na Fraince i bPáras, cluiche ar cinnte iomaíocht ghéar ann.

Dé Sathairn, an 7 Feabhra, bainfidh an lucht féachana sásamh as dhá chluiche rugbaí as a chéile ar an dá sheirbhís craoltóireachta, an Iodáil v Albain ar Virgin Media One agus Virgin Media PLAY agus Sasana v an Bhreatain Bheag ar RTÉ 2 agus RTÉ Player ina dhiaidh sin.

Beidh Comórtas Faoi-20 na Sé Náisiún ag tosú Dé hAoine, an 6 Feabhra. Cuirfidh foireann Faoi-20 na hÉireann tús lena bhfeachtas féin Dé Sathairn, an 7 Feabhra ag 8 i.n., agus iad ag imirt in aghaidh na Fraince i gcluiche a bheidh le feiceáil beo ar an RTÉ Player.

Leanfaidh comórtas Guinness Sé Náisiún na bhFear go dtí Dé Sathairn, an 14 Márta, nuair a bheidh Éire le hAlbain ag 2.10 i.n. ar Virgin Media One, Virgin Media PLAY agus RTÉ Radio 1 agus, ina dhiaidh sin, an Bhreatain Bheag v an Iodáil ag 4.40 i.n. agus an Fhrainc v Sasana ag 8.10 i.n. ar RTÉ2 agus an RTÉ Player.

Ní fada go mbeidh tuilleadh aicsin le feiceáil ag lucht leanúna an rugbaí agus tús á chur le Comórtas Sé Náisiún na mBan Dé Sathairn, an 11 Aibreán leis an bhFrainc v an Iodáil ag 12.25 i.n. ar RTÉ Player agus, ina dhiaidh sin, Éire v Sasana ag 2.25 i.n. beo ar RTÉ 2, RTÉ Player agus RTÉ Radio 1, agus an Bhreatain Bheag v Albain ag 4.40 i.n. ar Virgin Media Two agus Virgin Media PLAY.

Beidh craoladh teilifíse RTÉ faoi stiúir Jacqui Hurley, a mbeidh Jamie Heaslip, Simon Zebo, Stephen Ferris, Fiona Coghlan, Jim Hamilton, Bernard Jackman agus Donal Lenihan ar an bpainéal in éineacht léi. Is féidir leis an lucht leanúna coinneáil ar an eolas faoi thrí chomórtas na Sé Náisiún ar RTÉ2, RTÉ Radio 1 agus an RTÉ Player agus beidh an scéal is deireanaí á thabhairt beo ar a toirt, ábhar anailíse, nuachta agus agallaimh ar RTÉ.ie/Sport agus @RTErugby. Beidh Against The Head ar ais ar RTÉ2 oíche Luain le lón léargais agus beidh plé níos doimhne ar fáil gach seachtain freisin ar The RTÉ Rugby Podcast. Coinneoidh Nuacht RTÉ daoine go hiomlán ar an eolas, ar aip RTÉ News Now agus ar na seirbhísí eile.

Ag RTÉ Radio 1 amháin atá cearta craolta raidió maidir le Craobhchomórtais na Sé Náisiún agus beidh tráchtaireacht ar na cluichí iomlána a imríonn foireann fear agus foireann ban na hÉireann, chomh maith le torthaí agus tuairiscí ó na cluichí eile. Michael Corcoran a bheidh i mbun na tráchtaireachta ar na cluichí agus beidh comhthráchtaireacht, anailís agus tuairimíocht á cur ar fáil ag lucht an phainéil, ina measc Donal Lenihan, James Downey, Fiona Coghlan, Niamh Briggs, Shane Byrne, Marcus Horan agus Tyrone Howe.

Faoi stiúir Joe Molloy a bheidh an craoladh ag Virgin Media Television agus tá athrú ar an bpainéal saineolaithe ar a mbeidh Conor Murray, Rob Kearney, Andrew Trimble agus Ian Madigan chomh maith le Dave McIntyre agus Alan Quinlan sa bhosca tráchtaireachta. Beidh plé domhain á chur ar fáil ag an meitheal sin ó thús go deireadh Chraobhchomórtas Sé Náisiún na bhFear. Cuirfidh Virgin Media News na scéalta is déanaí ar fáil de réir mar a tharlóidh siad agus déanfar athbhreithniú ar aicsean na seachtaine ar fad ar

phodchraoladh VMTV an fhad a bhíonn na comórtais ar siúl. Má chailleann tú aon chuid den aicsean, is féidir sin a chúiteamh le clár buaicphointí Six Nations Highlights gach Domhnach agus is féidir coinneáil ar an eolas ar na meáin shóisialta trí Virgin Media Sport a chuardach.

Ag labhairt dó roimh thús an chomórtais, deir Declan McBennett, Ceannasaí Spóirt RTÉ: “Tá comórtas na Sé Náisiún le háireamh i gcónaí ar cheann de phríomhchomórtais na bliana i spórt na hÉireann agus tá i ndán go mbeidh Craobhchomórtas na bliana seo chomh spéisiúil, géar, tarraingteach agus a bhíonn i gcónaí. Cinntíonn an saothar i gcomhar idir RTÉ agus Virgin Media gur féidir leis an lucht féachana ar fud na tíre cruinniú le chéile ag faire an aicsin ar fad, idir an iomaíocht ghéar i bPáras agus an liúireach i mBaile Átha Cliath. Táthar tugtha do chraoltóireacht a dhéanamh a chuireann díocas, déine agus dúthracht na foirne i láthair, agus táthar ag tnúth le gach nóiméad den fheachtas spreagúil atá romhainn amach a chur ar taispeáint do mhuintir na hÉireann.”

Ag trácht dó faoi fhógairt na socruithe craolacháin, deir Brian Gleeson, Ceannasaí Spóirt, Virgin Media Television: “Ní minic a tharlaíonn rud atá nua go hiomlán i gcraobhchomórtas na Sé Náisiún, agus is ríspeisialta dá bhrí sin tús a bheith á chur leis an gcomórtas i mbliana oíche Déardaoin den chéad uair riamh, go háirithe nuair is cluiche chomh hiontach atá i gceist, Éire in aghaidh na Fraince i bPáras, á chraoladh beo ar Virgin Media One. Ní bheidh ach aon deireadh seachtaine amháin saor ó imirt i rith Chraobhchomórtas na bliana seo, is gearr a bheidh sé ag dul thart, ach tá saineolaithe nua ar an bpainéal i mbliana againn a chuirfidh an t-ábhar anailíse ar fáil don lucht féachana a mbíonn spéis mhór acu ann. Is iontach an rud, a bhuíochas den pháirtnéireacht idir sinne agus RTÉ, go mbeidh deis ag lucht féachana na hÉireann leanúint ag baint taitnimh as rugbaí den chaighdeán is airde, saor ó tháille-ar an-aer, go ceann na gceithre bliana seo romhainn. Is fada liom go dtosaíonn sé.”

Tá agallaimh ar fáil ach iad a iarraidh.

Caoilinn Putti, Ceannasaí Cumarsáide, RTÉ

Louise Zayed, Ceannasaí Cumarsáide, Virgin Media Television