Tá sé deimhnithe ag RTÉ go bhfuil íocaíocht faighte aige inniu ó Chumann Lúthchleas Gael i dtaca lena sciar 50% in GAAGO.
Dheimhnigh RTÉ i mí Feabhra 2025 gur aontaigh sé i bprionsabal le Cumann Lúthchleas Gael go ndíolfadh sé a leas in GAAGO agus go ndéanfaí an t-ioncam a bhaileofaí a athinfheistiú chun seirbhísí a chur ar fáil don phobal. Chuir RTÉ in iúl ag an am freisin go mbeadh aon chomhaontú ar a dtiocfaí sa deireadh faoi réir gach toiliú agus faomhadh riachtanach a bheith i bhfeidhm.
Tá gach toiliú agus ceadú curtha i bhfeidhm anois agus nuair a bheidh an íocaíocht seo faighte ó Chumann Lúthchleas Gael, beidh díol GAAGO curtha i gcrích.
Úsáidfidh RTÉ na fáltais ó dhíol a scaire in GAAGO – €3 mhilliún – chun infheistíocht a dhéanamh ina stiúideonna réigiúnacha agus ina shaoráidí léiriúcháin, go háirithe i gCorcaigh, i Luimneach agus i nGaillimh.
Ag labhairt dó faoi chríochnú an díolacháin, dúirt Príomh-Stiúrthóir RTÉ, Kevin Bakhurst:
“Comhfhiontar ríthábhachtach le Cumann Lúthchleas Gael ab ea bunú GAAGO in 2014 mar gur chuir sé ar chumas lucht leanúna na gcluichí Gaelacha ar fud an domhain teacht a bheith acu ar ár gcluichí náisiúnta. Ba mhaith liom buíochas a ghabháil le gach duine a roinn eolas agus saineolas chun go bhféadfaí GAAGO a bhunú, rud a bhí ríthábhachtach. Ba mhaith liom freisin aitheantas a thabhairt don chomhoibriú rathúil a bhí againn le Cumann Lúthchleas Gael de réir mar a d’fhorbair an tseirbhís, go háirithe le linn thréimhse na paindéime nuair nach raibh daoine in ann freastal go fisiciúil ar na cluichí a raibh siad chomh tógtha sin leo. Anois go bhfuil an díolachán tugtha chun críche is féidir linn ár ngeallúint go ndéanfaí na cistí sin a infheistiú arís chun cláir agus ábhar a léiriú don lucht féachana a chomhlíonadh, go háirithe inár stiúideonna léiriúcháin réigiúnacha agus inár n-áiseanna taobh amuigh de Bhaile Átha Cliath. Ba mhaith liom an deis seo a thapú chun gach rath a ghuí ar Chumann Lúthchleas Gael lena sheirbhís GAA+ agus táimid ag tnúth le bheith ag obair go dlúth leo i gcónaí chun tacú le cluichí náisiúnta na hÉireann sna blianta amach romhainn.”
Bunaíodh GAAGO in 2014 mar chomhfhiontar idir RTÉ agus Cumann Lúthchleas Gael.
CRÍOCH
Eolas breise: Neil O’Gorman | Bainisteoir Cumarsáide Corparáide, RTÉ | neil.ogorman@rte.ie
