Tá RTÉ & Éire Ildánach, le tacaíocht ón Tionscnamh Oileán Comhroinnte, tar éis a fhógairt go bhfuil 77 buaiteoirí óga i gcomórtas This is Art! na bliana seo, agus na hiarratais beagnach dúbailte ó anuraidh.

Tá sé fógartha inniu ag This is Art! RTÉ go bhfuil duaiseanna na bliana 2025 buaite ag 77 páiste agus duine óg agus go bhfuil trófaithe, sparánachtaí agus duaiseanna ar fiú €10,000 iad le bronnadh orthu. Bhí an méid daoine a ghlac páirt i gcomórtas na bliana 2025 ardaithe go mór, agus líon na n-iarratas beagnach dúbailte ón mbliain roimhe sin. Is léargas é seo ar an spéis ollmhór atá ag daoine óga sa chruthaitheacht ar fud oileán na hÉireann.

Cé go bhfuil 77 ealaíontóir óg ainmnithe mar bhuaiteoirí sna catagóirí, déanann an comórtas ceiliúradh ar gach duine óg a chuir a gcuid cruthaitheachta inár láthair i mbliana. Chuir gach ceann de na hiarratais le taispeántas bríomhar, éagsúil agus inspioráideach a tháinig chugainn as gach cearn d’Éirinn.

Le tacaíocht ó Éire Ildánach agus ó Thionscnamh na nOileán Comhroinnte, tá This is Art! RTÉ ag leanúint dá mhisean cruthaitheacht na hóige ar fud oileán na hÉireann a chur chun cinn agus aird a tharraingt air. Tugadh cuireadh sa chomórtas bliantúil uile-oileáin seo do dhaoine óga 18 mbliana d’aois agus níos óige freagairt do théama na bliana seo: This is Nature! Cuireadh iarratais isteach i gcúig chatagóir aoise, i raon leathan meán lena n-áirítear líníocht, péintéireacht, dealbhóireacht, decoupage agus meáin mheasctha.

Bronnfar duaiseanna ar 77 ealaíontóir óg i mbliana. Gheobhaidh na buaiteoirí a tháinig sa chéad áit i ngach catagóir gradam saincheaptha a chruthaigh an t-ealaíontóir agus an moltóir Maser. Gheobhaidh an dream a tháinig sa dara agus sa tríú háit – 28 iontrálaí – sparánachtaí chun a gcleachtas ealaíne a fhorbairt níos mó. Ina theannta sin, gheobhaidh an 20 iontrálaí is fearr i ngach catagóir moltaí pearsanta ón bpainéal moltóireachta.

Buaiteoirí 2025 sna Catagóirí

· 7 mbliana d’aois nó níos óige: Henry Sheehy (7), An Clár – ‘The Woods’

· Idir 8 agus 11: Keira Shand (11), Uibh Fhailí – ‘Roots of dreams under moonlit beams’

· Aois 12 go 15: Robyn Summerbell (14), Cill Mhantáin – ‘A Wasted Life’

· Aois 16 go 18: Evan Shanahan (17), Baile Átha Cliath – ‘Nature’s Call’

· Catagóir na nGrúpaí: Coláiste na nDoiminiceach, An Bóthar Ard, Gaillimh – ‘Legend to Life’

Tháinig painéal moltóirí na bliana seo le chéile i mBaile Átha Cliath mí ó shin chun léirmheas a dhéanamh ar na hiontrálacha agus na buaiteoirí a roghnú. Ar an bpainéal sin bhí an t-ealaíontóir graifítí agus sráide Maser, an múrmhaisitheoir agus oideachasóir Joe Caslin, an t-ealaíontóir agus dearthóir faisin Helen Steele, Stiúrthóir The Dock Mary Conlon, agus an t-éaneolaí Sean Ronayne. Bhí na moltóirí an-tógtha le flúirseacht na smaointeoireachta, na samhlaíochta agus na muiníne a léiríodh sna hiarrachtaí agus tharraing siad aird ar na bealaí cumhachtacha ar bhain na daoine óga tuiscint as an téama, ‘This is Nature!’

Agus iad ag labhairt faoi na hiontrálacha, bhí an méid seo le rá ag na moltóirí:

· Dúirt an t-amharcealaíontóir Maser, “Thugadh an ealaín guth dom nuair nach mbíodh na focail agam. Is rud cumhachtach atá ann ar an gcaoi sin – ligeann sé duit d’fhéiniúlacht a chur in iúl gan cead a iarraidh. Ní fios cén spreagadh a thug sé dom an fhreagairt a bhí ar This is Art! a fheiceáil. Bhí an chruthaitheacht, na saintréithe agus an mhuinín a bhí le tabhairt faoi deara san obair dochreidte. D’fhéadfá pearsantacht an duine a mhothú i ngach saothar. Sin atá i gceist leis – daoine óga ag cuidiú leo féin agus ag scaipeadh a gcuid smaointe sa domhan mór. Tá todhchaí na cruthaitheachta in Éirinn faoi chúram maith.’’

· Dúirt an múrmhaisitheoir agus an t-oideachasóir Joe Caslin, “Ceann de na rudaí is cumhachtaí faoin ealaín is ea an cumas atá ann scéalta a insint – scéalta faoi fhéiniúlacht, pobal agus muintearas. Thar rud ar bith eile thug mise suntas don mhacántacht agus don chrógacht a bhain leis an obair le linn an chomórtais seo. Níl faitíos ar na healaíontóirí óga seo iad féin agus na rudaí atá tábhachtach dóibh a thaispeáint. Mar gheall ar fhlúirseacht na smaointeoireachta agus leibhéal na scileanna a léiríodh, ba rud inspioráideach a bhí sa mholtóireacht, ach bhí sé thar a bheith dúshlánach freisin.”

· Bhí an méid seo le rá ag an ealaíontóir agus an dearthóir faisin Helen Steele, “Tá lear mór ealaíontóirí óga againn sa tír seo atá thar a bheith cumasach – is rud é sin a chreid mé i gcónaí, ach anois is féidir liom é a rá go cinnte dearfa. Ba mhór an pléisiúr é a bheith ag breathnú ar na hiontrálacha a tháinig ó pháistí agus ó dhaoine óga agus an oiread sin úrnuachta, scile, paisin agus ríméid a fheiceáil fite fuaite ina gcuid oibre. An t-aon deacracht a bhain leis ná go raibh buaiteoirí le roghnú – nuair a bhí an oiread sin tallainne i gceist, ba rud ollmhór a bhí ann cinneadh a ghlacadh.”

· Dúirt Stiúrthóir The Dock, Mary Conlon, “Ag The Dock, táimid tiomanta don chruthaitheacht a chur chun cinn i ngach céim den saol, agus cuireann an comórtas seo i gcuimhne dúinn an tábhacht a bhaineann leis sin ar bhealach cumhachtach. Bhí samhlaíocht agus muinín dochreidte le feiceáil sna hiontrálacha. Tá sé ríthábhachtach go mbraithfeadh daoine óga go bhfuil meas ar a gcruthaitheacht agus go bhfuil sí á ceiliúradh. Sin é go díreach atá á dhéanamh ag This is Art! Tá muid thar a bheith bródúil as gach duine a ghlac páirt.”

· Dúirt Sean Ronayne “Ní raibh mé cinnte céard a bhí romham nuair a ghlac mé páirt sa phainéal moltóireachta i dtosach mar ionadaí ar théama na bliana seo, ‘This is Nature!’, ach bhain mé an-taitneamh as léirmheas a dhéanamh ar na hiontrálacha. Chuirfeadh an tallann agus an croí a léiríodh i lear mór de na píosaí tocht ar dhuine. Bhí sé thar a bheith suimiúil na tuiscintí éagsúla a léiríodh ar an dúlra agus an bá atá leis a fheiceáil. Tá ríméad orm go raibh mé ar dhuine de na moltóirí agus tá mé bródúil gur féidir liom a rá go bhfuil glúin de dhaoine óga tuisceanacha, cumasacha againn sa tír seo.”

Agus í ag labhairt ar fhógairt na mbuaiteoirí, dúirt Suzanne Kelly, Ceannasaí RTÉ ar Ábhar do Leanaí agus do Dhaoine Óga:

“Cuimsíonn This is Art! an misean atá againne laistigh d’Ábhar do Leanaí agus do Dhaoine Óga in RTÉ. Tugann sé ardán do dhaoine óga cumasacha lenar féidir leo a gcruthaitheacht a thaispeáint agus mar thoradh air sin spreagtar daoine eile ar fud na tíre chun iad féin a chur in iúl tríd an ealaín. Is pribhléid é a bheith in ann tacú le daoine óga ar an gcaoi seo agus aird a tharraingt ar na healaíontóirí iontacha atá againn ar fud oileán na hÉireann. Ba mhaith linn gach duine a ghríosú le breathnú ar an ngailearaí digiteach le go bhfeicfidh siad na hiontrálacha neamhghnácha a tháinig ó gach cearn den tír. Mura bhfuil sé déanta agat cheana féin, tabhair cuairt ar an ngailearaí ar líne go bhfeicfidh tú a gcumas. ”

Breathnaigh ar ghailearaí digiteach This is Art! RTÉ anseo ar: thisisart.rte.ie/submissions áit a bhféadfaidh tú iontrálacha na bliana seo agus na

mblianta roimhe seo a fhiosrú. Lean @tia.ie ar Instagram, @thisisart.ie ar TikTok agus @RTEjr ar Facebook chun tuilleadh eolais a fháil ó This is Art! RTÉ.

CRÍOCH