Taibhléiriú Foo Fighters ar Other Voices le craoladh ar RTÉ Luan Cásca
Oíche den scoth geallta ar Other Voices nuair a thabharfaidh Foo Fighters faoi ardán beag Eaglais San Séamas sa Daingean lena gcuid amhrán cáiliúil. Sa taibhléiriú seo nach raibh súil ar bith leis, gheofar blaiseadh beag d’albam nua an bhanna atá ar na bacáin, Your Favourite Toy, a eiseofar an 24 Aibreán. Craolfar an sársheó Luan Cásca, an 6 Aibreán, ar RTÉ2 ag 9:30pm agus beidh sé le fáil ar fud an domhain ar RTÉ Player.
Taifeadadh an taibhléiriú an mhí seo caite in Eaglais San Séamas, áit bheag ar iomaí scéal a bhaineann leis. Seó aon oíche amháin a bhí ann chun ceiliúradh a dhéanamh ar a n-albam nua a eiseofar go luath. Coinníodh faoi rún é agus ní raibh ach 80 duine dá lucht leanúna i láthair. Beidh ceann de na grúpaí rac is mó ar domhain ar cheann de na stáitsí ceoil is ansa le muintir na hÉireann sa chlár speisialta seo.
Chuir na ceoltóirí iomráiteacha racanról tús le ceiliúradh 25 bliain Other Voices agus leanfar de cheoltóirí agus d’amhránaithe den scoth a thaifeadadh in áiteanna bheaga ar leith sa tsraith. Cuirfidh Foo Fighters taibhléiriú corraitheach a d’fheilfeadh do na mórshluaite os comhair ghrúpa beag 80 duine, seó ina dtabharfaidh siad ómós don chultúr pobail neamhspleách as ar eascair siad féin. Tá an banna ar an bhfód le fada an lá agus aintiúin dodhearmadta scríofa acu a chur go mór le múnlú rac-cheoil na linne seo. Seo é an seó is lú atá casta acu le blianta fada.
Is éard a dúirt Philip King, a bhunaigh Other Voices: “Ba mhór an pribhléid é agus ba mhór an ríméad a bhí orm fáilte a chur roimh Foo Fighters agus an fhoireann den scoth atá acu chuig Eaglais San Séamas sa Daingean. Léiriú iontach, tochtmhar agus paiseanta a bhí ann. Deis ceoil iontach a bhí ann agus ba é an gig staide ba lú ar domhan é. Ócáid ar leith i stair agus i scéal Other Voices a bhí ann agus ba bhealach dodhearmadta é chun an bhliain chuimhneacháin seo a cheiliúradh agus an seó ar an bhfód le 25 bliana.”
Is éard a dúirt Léiritheoir Feidhmiúcháin RTÉ Justin Healy: “Tá sé dochreidte gur roghnaigh Foo Fighters an Daingean, Other Voices agus RTÉ chun an taibhléiriú pearsanta speisialta glórach seo a chur chun stáitse. Tá ócáid speisialta againn don lucht féachána – uair an chloig d’amhráin aitheanta agus d’ábhar nua a seinneadh beo in Eaglais San Séamas sa Daingean. Bhí sé deacair é a choinneáil faoi rún ach is iontach an rud é anois a bheith in ann é a chur os comhair ní hamháin an lucht féachána agus éisteachta anseo in Éirinn ach an lucht féachana agus éisteachta ar fud na cruinne ar RTÉ Player.”
Sa chlár eisiach uair a chloig seo, beidh idir amhráin nua spreagúla ón dara albam stiúideo déag atá ar na bacáin, Your Favourite Toy, agus na hamhráin is ansa leis an lucht leanúna, ina measc My Hero, Everlong agus Times Like These, chomh maith leis an amhrán A320 nach bhfuil chomh haitheanta sin agus nár casadh beo ó 2000. Beidh aintiúin a bhfuil an-ghean orthu agus ábhar úrnua ar an seitliosta seo a thabharfaidh léargas ar shaolré an bhanna i dtimpeallacht nach bhfeicfear a leithéid arís go brách.
Is éard a dúirt príomhamhránaí Foo Fighters Dave Grohl: “Bhí an-spraoi go deo againn riamh in Éirinn. Ní dhearna muid aon rud mar seo riamh cheana. Tá seóanna beaga déanta againn os comhair líon an-bheag dár lucht leanúna ach seo é an chéad uair againn a bheith ag seinm i séipéal. De réir an eolais atá againn ar Other Voices, is rud ar leith é agus is áit ar leith é an Daingean.”
Craolfar Other Voices Presents: Foo Fighters Live in St James’ Church ar RTÉ2 ag 9.30pm Luan Cásca an 6 Aibreán agus beidh sé ar fáil le sruthú timpeall an domhain ar RTÉ Player.
-CRÍOCH-
Dáta: Déardaoin an 19 Márta 2026
Chun tuilleadh eolais a fháil, déan teagmháil le:
Kate Smyth, Ceannasaí Cumarsáide RTÉ, kate.smyth@rte.ie