“Foghlaí ós ár gcomhair amach”: Léargas tugtha i bpodcraoladh nua fíorchoireachta ar scéal iomlán an DJ raidió bhradach agus an mí-úsáideoir Eamon Cooke

Eolas nua faighte ag Pirate Predator ó íospartaigh agus ó dhaoine a tháinig slán as an mí-úsáid a rinneadh orthu ar an gcaoi ar cheil Cooke a chuid coireanna

Beidh podchraoladh nua fíorchoireachta ó RTÉ dar teideal Pirate Predator ar fáil ón lá inniu ar aghaidh, podchraoladh ina gcuirfear fianaise nua i gcás an DJ raidió bhradaigh Eamon Cooke, atá aitheanta anois mar dhuine de na mí-úsáideoirí gnéis leanaí ba ilghníomhaí in Éirinn, os comhair an phobail éisteachta. Nochtfar sa tsraith, a chraolfar ar RTÉ Radio 1 ón Domhnach seo ar aghaidh freisin, fianaise nua ó íospartaigh agus ó dhaoine a tháinig slán as an mí-úsáid a rinneadh orthu ar an gcaoi ar éirigh le Cooke na coireanna sin a dhéanamh. Beidh agallaimh mar chuid den phodchraoladh freisin le roinnt de na daoine a raibh baint acu leis an dlí a chur ar Cooke, a léireoidh an chaoi nár chosúil go raibh aon duine in ann méar a leagan air ar feadh na mblianta.

Ciontaíodh é in 2007 agus gearradh 10 mbliana príosúnachta air. D’úsáid Cooke – a fuair bás in 2016 – a stádas i ndeireadh na seachtóidí agus sna hochtóidí mar cheann an stáisiúin raidió bhradaigh mór le rá, Radio Dublin, chun teacht i dtír ar leanaí óga. Bhí líomhaintí a cuireadh i leith Cooke i mbéal an phobail ar feadh na mblianta sular ciontaíodh é faoi dheireadh. Óna theach in Inse Chór i mBaile Átha Cliath a rith “Captain Cooke”, a bhí ina phearsa ar an taobh thuathail, an stáisiún raidió, ach d’úsáid sé a theach agus a gharáiste chun leanaí a mhealladh chuige, muinín a chothú iontu, mí-úsáid a dhéanamh orthu – fiú agus an stáisiún ar an aer – agus bagairt a dhéanamh orthu a bheith ciúin ina dhiaidh sin.

Fiosraítear sa phodchraoladh nua – ón bhfoireann Doc on One RTÉ chéanna a léirigh na podchraoltaí First Conviction, Runaway Joe agus Stolen Sister, i measc podchraoltaí eile a bhfuil gradam buaite acu, – na naisc atá á mhaíomh a bhí idir Cooke agus Philip Cairns i Ráth Fearnáin i mBaile Átha Cliath sa bhliain 1986, ceann de na cásanna is mó aithne in Éirinn de dhaoine atá ar iarraidh nár réitíodh fós.

Insítear scéal iomlán ré uafáis Eamon Cooke in Pirate Predator, ina n-inseoidh roinnt de na daoine a tháinig slán as an mí-úsáid a rinneadh orthu a gcuid scéalta. Déanfar scrúdú sa tsraith freisin ar an mbaint a bhí ag Cooke le mí-úsáideoirí eile ag an am, Jimmy Savile ina measc.

Is éard a dúirt an scríbhneoir agus an reacaire Peter Mulryan: “Bhí mé ag iarraidh an tsraith seo a dhéanamh le fada chun tuiscint a fháil ar an gcúis ar éirigh le fear, ar cosúil gurb é duine de na mí-úsáideoirí ba ilghníomhaí in Éirinn, a choireanna a cheilt chomh fada sin. D’úsáid Cooke Radio Dublin le go mbeadh sé in ann teacht ar leanaí. Foghlaí ós ár gcomhair amach a bhí ann, Jimmy Savile na hÉireann, agus chuaigh a ré mí-úsáide ar aghaidh ar feadh blianta fada, díreach os comhair gach duine.”

Beidh Pirate Predator ar fáil ón lá inniu an 11 Bealtaine ar aghaidh, agus beidh clár nua ar fáil gach Luan. Ar fáil anois ar RTÉ Radio Player nó cibé áit a bhfaigheann tú do chuid podchraoltaí.

Beidh an tsraith á chraoladh freisin ar RTÉ Radio 1 gach Domhnach ag 7.30pm, ag tosú Dé Domhnaigh an 17 Bealtaine.

-CRÍOCH-
Kate Smyth, Ceannasaí Cumarsáide RTÉ